سباحو لبنان في بطولة العالم : نتائج مذهلة !!!

 
   أبو يوسف حاملا بيده جريدة     : تعا إقرا هالخبر يا أبو سليم  ؟؟

 أبوسليم   : خير شو في؟

 أبو يوسف  :  نتائج البعثة اللبنانية ببطولة العالم بالسباحة

 أبو سليم   : هات لنشوف

 أبو يوسف  فاتحا جريدة "الأخبار" في عددها الصادر نهار الخميس 23 كانون أول 2010 و يبدأ بقراءة الخبر التالي : 
عادت بعثة منتخب لبنان في السباحة التي شاركت في بطولة العالم (حوض 25 م) في دبي، من الفترة الممتدة من 13 الى 20 كانون الأول 2010، والمؤلفة من الاداري أسعد شاهين والمدرب عدنان العميل والسباحين: وائل قبرصلي ومكرم فاتول. وقد حققت النتائج الآتية:
وائل قبرصلي 18 سنة وما فوق:
ــ 50 متراً صدر: 31.11 ثانية. وقد حل في المركز 63 من أصل 92 مشاركاً.
ــ 100 متر صدر : 1.06.33 دقيقة. وقد حلّ في المركز 66 من اصل 81 مشاركاً.
ــ 200 متر صدر : 2.21.54 دقيقة. وقد حل في المركز 41 من أصل 57 مشاركاً.
مكرم فاتول 18 سنة وما فوق:
ــ 50 متراً حرة : 24.73 ثانية. وقد حل في المركز 79 من أصل 136 مشاركاً.
ــ 100 متر حرة : 53.27 ثانية. وقد حل في المركز 76 من اصل 125 مشاركاً.
ــ 200 متر حرة : 1.57.97 دقيقة (رقم قياسي جديد ـ السابق 1.58.21 للسباح باسل الكعكي)، وقد حل في المركز 62 من أصل 78 مشاركاً.

 أبو سليم  :   طيب يا أبو يوسف , اللبناني مش فاضي للسباحة  , صحيح إنو  لبنان عندو أطول شط بالعالم نسبة لمساحتو و صحيح إنو بلد ساحلي بإمتياز  , بس نحنا بعمرنا ما تميزنا بالسباحة .   يعني مش هيدا المجال يللي منتميز فيه  . 

 أبو يوسف  : و بشو منتميز نحنا يا عمي , بشو ؟؟ والله لما شفت هالنتايج خجلت يا أبو سليم خجلت !!!
 أبو سليم  : لهيا أبو يوسف له , ليش إنت ما بتعرف نحنا بشو متفوفين , مين متل اللبناني "كيف ما بتزتو بيجي واقف" , و إذا بدك شي إلو علافة بالبحر , اللبناني "إذا بتزتو بالبحر بيطلع و بتمو سمكة" , أو كيس زبالة  , حسب  وين زتيتو يعني , بصور أو بصيدا !
كمان مين متل اللبناني بيلبس عوينات  "راي بان" و بيتمدد على "شيزلونغ "  و شو فكرك هيدي هينة أو أيا "جغل" فيه يعملا ؟؟  , خليهون يعملوا بطولة العالم بالتجغيل وخلي حدا يوقف بوجنا.
بعدين إذا الشباب بدون يضيعوا وقتون على التدريبات و يفلقوا حالون ليحطموا الأرقام القياسية مين بدو يقعد بالكافيات و النايتات و مين بدو يدخن السيغار و يأرغل الأراغيل و يتذاكى و يخبر عن مغامراتو , و ينكت , مين قدو للبناني بالتنكيت و التقريق .

كل بلد يا أبو يوسف بيتميز بشي بس إنت عندك عقدة  و شوف كيف بدك تخلص منها .

ملاحظة هامة : لم يذكر التقرير أسماء المشاركين الذين حلوا في المراكز الأولى و الدول التي يمثلونها , و لا المشتركين الذين فازوا بالمراكز الأخيرة , لا شيء يهم . المهم المراكز المتقدمة التي حققتها البعثة اللبنانية .